A Fiscalía venezolana citará a González Urrutia para investigalo penalmente

A Fiscalía de Venezuela informou este venres de que citará "nas próximas horas" o candidato presidencial da oposición maioritaria, Edmundo González Urrutia, por unha investigación penal na súa contra, debido á presunta comisión de delitos asociados á denuncia de fraude electoral que fixo o antichavismo.

Esperan que o abandeirado da Plataforma Unitaria Democrática (PUD) fale sobre a páxina web na que se publicaron actas electorais que, segundo o antichavismo, confirman a súa vitoria nos comicios do 28 de xullo.

"Ten que vir a esta citación para que fale da súa responsabilidade no antes, durante e despois do 28 de xullo, polo súa contumacia, a súa desobedicencia ás autoridades", expresou o fiscal nunha alocución transmitida pola canle estatal VTV.

O fiscal aspira a que o opositor "renda declaracións sobre a súa autoría" na publicación destes datos, o que -remarcou- "usurpou" unha tarefa "que soamente corresponde" ao Consello Nacional Electoral (CNE), que aínda non publicou os resultados desagregados que confirmen a anunciada vitoria de Nicolás Maduro nas urnas.

"El non dá a cara, non se sabe onde está", comentou o fiscal, en alusión á decisión de González Urrutia de permanecer "en resgardo" ante as ameazas do chavismo, que pediu cárcere para el e para a súa principal valedora, María Corina Machado.

O anuncio do fiscal prodúcese un día despois de que o Tribunal Supremo de Xustiza confirmara a vitoria de Maduro, o que foi rexeitado por numerosos países que piden ás autoridades de Venezuela publicar os resultados electorais detallados.

Entre os delitos mencionados pola Fiscalía na investigación contra González Urrutia atópanse o de usurpación, conspiración e asociación para delinquir.