A gasolina sobe un 1,8 % e volve a niveis de hai un ano, cando se aplicaba desconto

A gasolina e o gasóleo repuntaron de media na última semana un 1,8 % e un 3,4 %, respectivamente, confirmando a súa evolución á alza ao encadear a súa quinta subida consecutiva, que no caso do primeiro combustible fai que regrese a niveis de hai un ano, en plena tempada de vacacións.

Segundo o Boletín Petroleiro da Unión Europea (UE), que recolle os datos de máis de 11.400 estacións de servizo en España entre o 1 e o 7 de agosto, o prezo medio da gasolina situouse en algo máis de 1,68 euros o litro, mentres que o gasóleo custou case 1,553 euros.

O seu quinto avance seguido deixa a gasolina en rexistros non vistos desde mediados de 2022, en plena crise enerxética pola invasión rusa de Ucraína, coa diferenza de que por aquel entón aínda estaba en vigor o desconto de 20 céntimos por litro aprobado polo Goberno.

Sempre aplicando a citada rebaixa, o prezo medio deste carburante entre o 26 de xullo e o 1 de agosto do pasado exercicio foi de 1,702 euros/litro (sen bonificación sería de 1,902 euros/litro), coincidindo coa grande operación saída dese verán.

Unha semana despois, o litro de gasolina caeu ata os 1,66 euros, desconto incluído (sen el estaría nos 1,86 euros).

Con todo, hai que ter en conta que a comparativa elaborada realízase en base aos prezos finais pagados polos usuarios das estacións de servizo en España, de modo que incorpora o efecto da bonificación dos 20 céntimos en 2022.

Sen considerar esta medida e tomando como referente unicamente a media en bruto que publica o Boletín Petroleiro, a gasolina aproximouse na última semana aos 1,688 euros/litro (ou 1,488 euros con desconto) que marcou entre o 29 de novembro e o 5 de decembro.

O gasóleo, en cambio, marca o seu valor máis alto desde os 1,546 euros/litro de finais do pasado marzo.

Por tanto, a gasolina -agora sen bonificación- é un 1,2 % máis cara ca hai un ano, á vez que o gasóleo custa un 6,11 % menos.

En relación coa primeira semana deste 2023, en que aínda se deixaban sentir os efectos do desconto nos últimos días de decembro, a gasolina encareceu case un 21,5 % e o gasóleo, un 6,37 %.

Se se observan os datos de hai un mes, o primeiro carburante é agora un 5,4 % máis caro, e o segundo, un 7,8 %.

Os prezos de ambos os carburantes, iso si, están lonxe dos máximos históricos que alcanzaron en xuño de 2022, xa que a gasolina custa un 13,4 % menos e o gasóleo, un 18,3 % menos.

Cos prezos actuais, encher con gasolina un depósito de 55 litros custa 92,4 euros, mentres que se se enche con gasóleo, o prezo é de 85,41 euros, o que supón un incremento de 1,1 euros respecto a hai un ano e unha rebaixa duns 5,6 euros no segundo.

Inmersos nun escenario de encarecemento do petróleo, os carburantes en España volveron estar por baixo da media dos Vinte e sete da Unión Europea, onde o prezo estivo arredor dos 1,802 euros o litro de gasolina e duns 1,689 euros o de gasóleo.

Máis caros foron aínda na eurozona, onde o litro de gasolina se pagou de media a 1,862 euros, e o de gasóleo, a máis de 1,725 euros.