A lei do litoral, lista para a súa aprobación antes do 23X entre críticas da oposición
A lei do litoral, lista para a súa aprobación antes do 23X entre críticas da oposición
A nova lei permitirá, entre outras cuestións, regularizar edificacións e instalacións xa existentes na franxa costeira
![](https://img-g24-crtvg.flumotion.com/prog24/2023/20230704/20230704LeiLitoral3.png)
A lei de ordenación e xestión integrada do litoral de Galicia, contra a que alegou o Goberno central por considerar que invade competencias estatais, aprobarase antes das eleccións xerais do 23 de xullo, algo que criticou a oposición.
Tanto o BNG como o PSdeG acusan o PP de acelerar a tramitación deste proxecto de lei tras o adianto electoral, coa intención de "confrontar" co Executivo de Pedro Sánchez, e abstivéronse á hora de votar o texto, aprobado polo PPdeG en solitario na Comisión de Ordenación do Litoral a pasada semana.
A nova lei permitirá, entre outras cuestións, regularizar edificacións e instalacións xa existentes na franxa costeira, uns 4.000 inmobles en total, entre eles máis de 300 industrias, fronte á normativa do Goberno central máis restritiva, e tamén parques de eólica mariña.
O BNG presentou 85 emendas
Ao texto do proxecto de lei, que pasará no pleno da semana que vén o seu debate de aprobación final, incorporáronse 25 emendas das 85 presentadas polo BNG, á parte de transaccionarse outras nove con este mesmo grupo, polo que o PPdeG destacou que se aceptaron "o 38 % das emendas" nacionalistas.
Cambio de posición do PSdeG
Pola súa banda, o PSdeG non presentou emendas e rexeitou de plano apoiar a nova normativa para non ser "cómplices nin colaboradores necesarios do uso electoralista" que cre que fai o PPdeG, segundo argumentou a deputada socialista Patricia Otero.
Ademais, xustificou os cambios de postura do seu partido con respecto a esta lei, que inicialmente apoiou, en que o PPdeG non cumpriu co obxectivo declarado de "dotar de seguridade xurídica a cadea mar-industria nin protexer o litoral de pelotazos urbanísticos", senón que só responde aos seus "intereses partidistas".
Do mesmo xeito que o BNG, reprocharon a PPdeG e á Xunta a tramitación "exprés" desta normativa, que en principio estaba previsto aprobar a finais de ano, por mor do adianto electoral, algo que os populares xustificaron porque era necesario unha "blindaxe" da xestión do litoral galego fronte a "calquera Goberno que saia das urnas".
No PP din que é unha lei de país
Así o explicou o viceportavoz parlamentario do PPdeG Alberto Pazos, quen negou as acusacións da oposición tamén pola falta de participación á hora de elaborar o texto, ao asegurar que é "unha lei de país" coa que Galicia poderá exercer as competencias que xa lle outorga o seu Estatuto de Autonomía.