A lei ELA sae adiante por unanimidade nunha "xornada histórica" para os afectados

O Congreso aprobou "por fin", e cun atraso de case tres anos, a lei para mellorar a calidade de vida de persoas con esclerose lateral amiotrófica e outras enfermidades ou procesos de alta complexidade e curso irreversible, coñecida como lei ELA. 

Foi co consenso de toda a Cámara, que urxiu agora o Goberno a que lle dedique unha dotación suficiente e elabore no prazo dun ano un "bo" regulamento que concrete o conxunto de beneficiarios.

Este texto expón unha serie de cambios lexislativos "orientados a garantir a mellor calidade de vida, a través da axilización dos trámites administrativos para o recoñecemento da discapacidade e a dependencia, nunha mellor atención integrada entre os sistemas de coidados sociais e sanitarios, das persoas afectadas". 

A asistencia 24 horas en fases avanzadas ou o mantemento da base de cotización dos coidadores que deben abandonar os seus traballos sen que afecte á súa pensión futura, son outras das medidas que os afectados e as súas familias agardan.

"Xornada histórica", "Día para a alegría" ou "Xustiza" foron algunhas das expresións máis utilizadas polos portavoces parlamentarios para celebrar a unanimidade ao redor dunha lei que, con todo, quixeron agradecer aos seus verdadeiros responsables: as entidades de pacientes que levan anos reclamándoa.

En presenza de 37 deles e dos seus coidadores, entre eles o exfutbolista Juan Carlos Unzué ou o senador socialista Juan Ramón Amores, que seguiron o pleno desde a tribuna sen poder conter a emoción, a Cámara Baixa avalou o texto refundido de PP, PSOE e Junts aprobado na Comisión de Dereitos Sociais cos 344 votos favorables que se emitiron, sen votos en contra nin abstencións, coa previsión de que pase o seu último trámite no Senado este mesmo mes. 

Por parte do PP interveu o seu líder, Alberto Núñez Feijóo, que comezou dando as grazas ás entidades precursoras desta lei. "Esta é a vosa casa: podedes seguir contando connosco", aseguroulles.

Feijóo dixo ser "consciente" de que non se lles vai poder "devolver" o tempo de demora na aprobación da norma e insistiu en que é un "motivo de orgullo", pero de pouco servirá se non lla dota anualmente con 250 millóns de euros para a posta en marcha de medidas

Maribel García, do PSOE, tamén eloxiou aos pacientes polo seu "exemplo de resiliencia e dignidade" e quixo trasladarlles a súa máis "profunda gratitude".

A deputada aproveitou a súa intervención para advertir que "nunca haberá avances en dereitos sociais se non hai unha democracia forte, e esta lei é un claro exemplo" porque "fortalece a nosa sociedade e Estado do benestar".

En canto se publique no BOE, algo que espera leste mesmo mes, a norma xa beneficiará aos enfermos de ELA, mentres se agarda a que o Goberno estableza un regulamento para definir outras afeccións de alta complexidade que tamén se van beneficiar como Duchennes, Huntington, alzhéimer ou párkinson, enumerou.

 Dende Galicia, a conselleira de Política Social asegura que é un día histórico que lles fai xustiza aos enfermos de ELA, pero pide que se garanta ese financiamento. Fabiola García di que o Goberno galego foi o primeiro en poñer en marcha unha liña de axudas específicas para os afectados por esta enfermidade.