A policía recibiu hai un mes unha denuncia anónima da desaparición do mozo da Illa de Arousa

O Corpo Nacional de Policía, por medio do seu servizo de denuncias a través de Internet, recibiu hai un mes unha alerta anónima acerca da desaparición dun mozo da Illa, I. D. V., quen presuntamente caera ao mar desde a cuberta dun veleiro durante unha operación de transporte de cocaína ata as costas galegas.  

A denuncia tamén indicaba que o presunto narco caera á auga sen que se decatase do accidente o resto da tripulación, polo que desaparecera no mar, xa preto do litoral galego. Segundo confirmaron a Europa Press fontes da investigación, foi precisamente esta denuncia anónima a que desencadeou que as unidades antidroga das forzas de seguridade puxesen en marcha un operativo para tratar de dar co paradoiro do mozo insular, que tiñan no punto de mira desde hai tempo polas sospeitas da súa dedicación a actividades ilícitas.  

As investigacións realizadas corroboraron que, efectivamente, nada se sabía do mozo desde finais de agosto e que non se volveu ver desde entón por ningún dos lugares que frecuentaba. Pero a investigación deuse por finalizada ao non existir ningunha outra denuncia máis que a que unha persoa anónima realizou a través do portal web da Policía Nacional.  

A difusión a principios de novembro do caso a través dos medios de comunicación e a denuncia que ao día seguinte de coñecerse a noticia presentou a nai do desaparecido na comisaría de Vilagarcía reactivaron o caso, que xa foi trasladado ao Xulgado número 3 da capital arousá para que instrúa as correspondentes dilixencias.