A policía investiga a morte de dous mozos por disparos en Almería
A policía investiga a morte de dous mozos por disparos en Almería
Os axentes traballan coa hipótese dun axuste de contas
Os cadáveres dos dous homes de entre 20 e 30 anos localizáronos no barrio almeriense de Los Molinos
![Barrio de Los Molinos, onde apareceron os dous cadáveres con disparos](https://img-g24-crtvg.flumotion.com/prog24/2024/20240721/mortostiroteoAlmeria.png)
Os investigadores manexan un axuste de contas como posible móbil da morte de dous mozos de entre 20 e 30 anos. Os cadáveres con feridas por arma de fogo localizáronos este domingo no barrio almeriense de Los Molinos.
A policía precisa que os corpos dos dous mozos, de orixe magrebí, apareceron con signos de violencia sobre as 02:30 horas deste domingo na rúa Alcolea, ás costas dun coñecido pub deste barrio, situado na rotonda que deriva o tráfico cara ao aeroporto.
Segundo explicaron, un dos falecidos presenta un disparo na cara e o segundo, separado unhas decenas de metros de primeiro, outro tiro na cabeza.
Todo indica que un deles intentou escapar á carreira, xa que no seu caso o disparo impactou por detrás, o que explicaría a separación co corpo do outro executado.
Desde a Comisaría Provincial de Almería informaron de que a Brigada de Policía Xudicial investiga os feitos e que "se está procedendo á autopsia dos cadáveres e, polo que aínda non se saben as circunstancias" deste suceso.
A delegación de Saúde e Consumo da Xunta indicou que cando chegou ao lugar o 061 os mozos xa faleceran e sinalaron que o caso se atopa baixo secreto de sumario.