A reforma das pensións e a lei de vivenda centran o debate político

Desde Estremadura, a número dous do PSOE, María Jesus Montero, insistiu en que Pedro Sánchez demostrou que outra política é posible defendendo os servizos públicos, o incremento do salario mínimo e unha revalorización das pensións para o presente e tamén para o futuro.

"Teremos tamén un sistema público de pensións que nos permita a todos vivir unha vellez tranquila despois de levantar a pulso un país e de construír a democracia que nos trouxo ata aquí".

Unidas Podemos celebraba unha xornada monográfica sobre vivenda e Ione Belarra reclamou unha lei para o sector que regule os alugueiros nas zonas tensionadas e os desafiuzamentos, e que amplíe o parque público de edificios. Nesa liña, deixou unha mensaxe explicita para o PSOE:

"Se non aprobaron a lei de vivenda nestes últimos tres anos por compromiso cos dereitos sociais que ten esta forza política, polo menos que o fagan por electoralismo, porque España necesita máis gobernos progresistas os próximos catro anos".

A conselleira encargada deste ámbito, Ángeles Vázquez, considera que a lei de vivenda que se negocia no seo do Goberno é "ideolóxica", non soluciona os problemas de fondo e invade as competencias das comunidades autónomas sen dialogar con elas.

 "Eu teño que cualificala de anticonstitucional. Digo que é anticonstitucional desde o momento en que temos as competencias as comunidades autónomas, competencias que nos queren restar e co cal non podemos estar de acordo".