A venda de tests da gripe e a covid multiplícase por dez nas farmacias galegas

Coas infeccións respiratorias entrando no seu habitual pico invernal, nas farmacias non dan abasto coa venda de test. Especialmente coas probas que diferencian entre os dous tipos de gripe, A e B, e a covid, chegan a esgotar existencias.

É un boom. Pero advirten os farmacéuticos que saber que virus é non é o máis relevante. Con patoloxía leve, o que se tratan son os síntomas, e cos mesmos medicamentos a gripe A, a B ou covid. Así que pode resultar sorprendente ese empeño en saber de que virus se trata.

 "A min chámame a atención, porque se eu estou cunha patoloxía, que máis me dá saber se é gripe ou covid. Eu teño que protexerme, coidarme e non ser egoísta: pór máscara, ter coidado de non achegarme a persoas maiores", di Natalia Martínez, farmacéutica no Milladoiro.

Con calquera síntoma, ventilar e protexer os vulnerables é máis importante que saber se o virus é un dos tres que marca o test.

"Hai catarro, hai outros virus respiratorios circulando, e que che dea negativo nun test non significa que non poidas ter outra patoloxía", engade Natalia. 

Saber que virus si é importante no caso das persoas maiores e vulnerables. Hoxe os tests seguen co prezo fixado polo Estado, pero xa volven pagar IVE. Nas farmacias, as marxes redúcense tamén porque moitas distribuidoras aproveitan a epidemia para subirlles os prezos.

Así que hoxe quedamos con este xesto... e esta conclusión: "Se temos que escoller en gastar os cartos en test ou máscara, optemos pola máscara".