A Xunta e o Concello de Vigo asinarán un convenio para financiar solucións para afectados polo incendio

A Xunta de Galicia e o Concello de Vigo asinarán un convenio de colaboración para financiar solucións habitacionais aos afectados polo incendio rexistrado a semana pasada nun edificio da rúa Alfonso X O Sabio, no que faleceron catro persoas.

Así o sinalou a delegada do Goberno galego en Vigo, Ana Ortiz, ao termo dun encontro con representantes municipais, co obxectivo de buscar solucións para as oito familias afectadas polo lume no inmoble ocupado.

Ante os medios de comunicación, Ortiz subliñou que a Xunta quere "tender a man" ao Concello de Vigo ante esta "situación excepcional e complexa", ofrecendo financiamento para buscar solucións de residencia e de acompañamento a estas familias.

A pesar de que remarcou que se trata dunha competencia municipal, no ámbito dos Servizos Sociais, a delegada do Executivo autonómico mostrou a súa predisposición para axudar ao goberno local no apoio a estas persoas financiando os medios que necesiten.

Por iso, indicou que este xoves o Concello enviará á Xunta a documentación das familias afectadas. A partir de aí, poderase coñecer que requiren e en que situación se atopan, xa que na actualidade Ortiz descoñece se algunhas delas cobran ou non algunha prestación pública.  

Ademais, a semana que vén levará a cabo unha nova reunión para especificar que necesidades teñen os afectados e que solucións se lles pode dar desde as administracións. "Quedamos en que nos ían pasar os informes sociais das oito familias afectadas para que podamos estudar cada caso concreto, cales son os recursos que desde a Xunta podemos achegar", engadiu Ortiz.

Para ela, a "forma idónea" desta colaboración é a través dun convenio de colaboración, "a pesar de que as competencias son municipais". "Desde a Xunta estamos dispostos a colaborar", sentenciou.

Pola súa banda, a concelleira de Benestar Social, Yolanda Aguiar, presente no encontro, destacou o clima de "máxima cordialidade" da reunión. Nun audio difundido aos medios de comunicación, lembrou que as competencias de vivenda son "exclusivas" da Xunta, polo que pediu ao Executivo autonómico que busque unha solución residencial a estas familias.

En concreto, solicitou que se lles adxudique de forma directa pisos de promoción pública en réxime de alugueiro social, xa que, segundo ela, así o permite a lei ao tratarse dunha situación "extraordinaria" e dun colectivo, como é a etnia xitana, "profundamente estigmatizado e con moitas dificultades para acceder a unha vivenda no mercado libre".

Aguiar indicou que "existen mecanismos ao alcance da Xunta para adxudicar vivendas de promoción pública", polo que a semana que vén volverán reunirse para que o Goberno galego analice o stock de vivenda dispoñible e valore neste tempo a posibilidade desta concesión.