A Xunta lamenta a falta de información e que algúns "fagan política" coa chegada dos migrantes

A conselleira de Política Social insiste en que a Xunta de Galicia non ten información concreta sobre a chegada de migrantes a Galicia dentro da repartición prevista entre as comunidades autónomas. 

Fabiola García mantén que non saben o número exacto nin tampouco a data de chegada, algo que cren imprescindible para poder preparar o dispositivo de acollemento que precisan. A conselleira lamentou que algúns queiran "facer política" con esta crise humanitaria e subliñou que foi o presidente da Xunta o que se dirixiu ao Goberno central para reclamar información detallada.

Nesta liña, volveu reprochar as últimas declaracións de varios membros do Goberno, entre eles o presidente Pedro Sánchez, nas que acusaban á Xunta de Galicia de non acoller a ningún menor migrante en 2023.

"Non imos aceptar que tanto a ministra Rego como o propio presidente, mintan. Mentiron cando dixeron que Galicia non acollía menores cando en 2021, 2022, 2023 e agora en 2024 votamos si na conferencia sectorial para acoller a todas esas persoas menores migrantes", lembrou.

 

"E agora atopámonos con que a nova ministra, Elma Sáez, ocúltanos información. Témonos que decatar de que van chegar persoas por detrás. Nós o que queremos é darlle a calidade de vida que merecen a todas estas persoas. E para iso necesitamos que nos digan que criterios de repartición están a empregarse nestes momentos para distribuílas para ter un dispositivo preparado", engadiu Fabiola García

Sánchez pídelle apoio ao Partido Popular

Este xoves o presidente do Goberno Pedro Sánchez pedíalle ao Partido Popular que apoie a reforma da lei de estranxeiría que o PSOE levou con Sumar e Coalición Canaria ao Congreso. O Goberno carece dos apoios dos seus socios habituais para sacala adiante. Ante a situación límite de colapso que se vive nas Canarias, Sánchez recorre aos populares.