A xustiza ordena reabrir a causa polo accidente do Marisquiño e insta a concretar posibles responsabilidades penais

A sección quinta da Audiencia Provincial de Pontevedra acordou reabrir a causa polo accidente ocorrido en agosto de 2018 durante un concerto do festival O Marisquiño, cando parte dun peirao colapsou na zona portuaria de Vigo, provocando máis de 400 persoas feridas.

O tribunal responde así aos recursos presentados por varios dos afectados, e implica a devolución das actuacións ao Xulgado de Instrución número 3 de Vigo para que se concreten as posibles responsabilidades penais dos investigados.

O auto, emitido o 7 de abril de 2025, revoga así o sobresemento provisional ditado en xaneiro de 2023, cando o xulgado de primeira instancia considerara que os feitos carecían de relevancia penal e remitiu ás persoas afectadas á vía civil.

Entre os argumentos daquela resolución figuraba a inexistencia de normativa específica sobre o mantemento da estrutura no momento da súa construción.

Crítica á interpretación xudicial e deber de coidado

Con todo, a Audiencia discrepa da interpretación da xuíza instrutora, advertindo de que asumir esa lectura deixaría fóra do ámbito penal calquera actividade non regulada administrativamente.

“Reducido ao absurdo -sinala o auto-, non se podería sancionar a ninguén pola caída dunha ponte romana ou dunha igrexa medieval por falla de mantemento”.

O tribunal destaca que a omisión do mantemento suporía unha vulneración do dereito á vida e á integridade física e moral da cidadanía.

Ademais, lembra que o proxecto ‘Abrir Vigo ao Mar’, deseñado polo arquitecto Vázquez Consuegra, incluía normas de mantemento que non se cumpriron. Segundo a Audiencia, houbo “unha omisión completa das revisións que precisaban as estruturas”.

Posibles implicacións penais e civís

A resolución considera que debe analizarse se se pode imputar a responsabilidade penal a algunha das persoas investigadas en función das tarefas concretas que tiñan asignadas e da súa participación nos feitos.

Subliña que a responsabilidade penal só se pode aplicar a persoas físicas, pero tamén pide valorar se se pode esixir responsabilidade civil, directa ou subsidiaria, ás entidades públicas implicadas.

Durante a instrución, estiveron investigados tres técnicos do Porto de Vigo -incluída a súa directora, Beatriz Colunga- e dous técnicos municipais.

A Fiscalía solicitara a comparecencia do daquela concelleiro de Seguridade, Carlos López Font, e doutro técnico municipal, pero esas citacións non se concretaron antes de que expirase o prazo legal de instrución.

Cara a un xuízo penal

O avogado Francisco Méndez Senlle, representante de tres dos afectados que recorreron, valorou positivamente a decisión da Audiencia.

Segundo indicou, esta resolución "abre a porta a que, finalmente, se celebre un xuízo penal polo accidente", nun caso no que máis de 400 persoas resultaron feridas ao ceder unha parte do peirao durante o evento.