Aberto ata o 20 de marzo o período para solicitar praza en centros escolares para o curso 2024/25
Aberto ata o 20 de marzo o período para solicitar praza en centros escolares para o curso 2024/25
O prazo atinxe o alumnado que entra por primeira vez no sistema educativo e os traslados de centro escolar
Os trámites poden realizarse de forma presencial ou por vía telemática a través da aplicación informática aloxada no Portal Educativo
A matrícula abrirase a partir do 20 de xuño
Este venres, 1 de marzo, quedou aberto o período para solicitar praza nos centros escolares galegos para o curso 2024/25, que poderá pedirse ata o próximo día 20 deste mes.
O procedemento, como explicou a Consellería de Educación nun comunicado, está enfocado ao alumnado que entra por primeira vez no sistema educativo e para aqueles alumnos que desexen cambiar de centro escolar.
Os trámites poden realizarse de forma presencial ou por vía telemática a través da aplicación informática aloxada no Portal Educativo e a xanela para formular a matrícula abrirase a partir do 20 de xuño.
Desde esa data e ata o 1 de xullo poderán rexistrar a súa matrícula os alumnos de infantil e primaria, mentres que do 23 de xuño ao 8 de xullo será a quenda de ESO e bacharelato.
Antes, as listaxes provisionais de admitidos e excluídos serán publicados o 25 de abril. O 15 de maio farase pública a relación definitiva.
A través das ferramentas telemáticas, as familias poderán consultar o estado de tramitación da solicitude nas distintas fases do procedemento empregando o código que xera a aplicación ao gravar a solicitude, xunto co DNI do proxenitor ou proxenitora asinante.
