Abre ao tráfico o túnel que conecta a AP-9 coa estación de Vialia en Vigo
Abre ao tráfico o túnel que conecta a AP-9 coa estación de Vialia en Vigo
A infraestrutura posibilita a entrada directa desde a autoestrada ao aparcamento co centro comercial, onde se sitúan as estacións de tren e bus, e tamén a incorporación desde este á AP-9
O túnel que conecta a autoestrada AP-9 co centro comercial de Vialia, onde están as estacións de tren e autobús de Vigo, abriu á circulación este martes ás 6 da mañá.
O túnel posibilita a entrada directa desde a autoestrada ao aparcamento e a incorporación desde este á AP-9, o cal, en palabras do rexedor vigués Abel Caballero, alixeirará o tráfico, xa que os vehículos que cheguen a Vigo para ir a Vialia non terán que acceder ao centro da cidade.
O conxunto dos accesos ao centro comercial custaron, segundo Caballero, máis de once millóns de euros.
O alcalde dixo que con esta apertura "remata a grande obra de Vialia" e indicou que o túnel dispón de equipamento completo para garantir a seguridade, paneis de mensaxería, iluminación, ventilación, sistema de detección de incendios e gases e control de acceso, entre outros.
