Absolven o alcalde de Ourense do delito de maltrato por empuxar unha manifestante
Absolven o alcalde de Ourense do delito de maltrato por empuxar unha manifestante
Na sentenza, o xuíz asegura: "Aínda que a súa reacción quizais sexa un tanto desproporcionada, en ningún momento alcanza a intensidade suficiente como para ser considerada delituosa”
O Xulgado de Instrución número 2 de Ourense absolveu o alcalde Gonzalo Pérez Jácome do delito leve de maltrato de obra que lle imputaban por empuxar unha participante nunha concentración que tivo lugar na porta do Concello o 3 de maio de 2022.
O xuíz explica na sentenza que as partes non discuten o sucedido porque o incidente está recollido nunha gravación, cuxo contido non impugnaron, pero conclúe que, ao seu xuízo, a actuación do rexedor municipal é “unha mera reacción ao feito de que a denunciante utilizase o megáfono a escasos centímetros da súa cara”.
Explican nun comunicado da oficina de prensa do Tribunal Superior de Xustiza de Galicia (TSXG), que na sentenza basea a súa conclusión no feito de que despois de propinar o empuxón, o alcalde a suxeitase durante varios segundos, polo que asegura que “parece clara” a súa intención de evitar que puidese “utilizar novamente o megáfono preto da súa cara”.
Ademais, indica que é “significativo” o feito de que despois do empuxón se iniciase unha discusión entre ambos, na que o alcalde “parece estar reprochándolle algunha cousa, o cal tamén é compatible coa versión dos feitos que ofreceu no acto da vista”.
No xuízo, o rexedor afirmou que en ningún momento tivo a intención de agredir ou maltratar a participante na concentración. Así, manifestou que o único que pretendía era “apartar a denunciante” e que reaccionou dese modo “pola utilización que realizou do megáfono, xusto a escasos centímetros da súa cara”. Ademais, declarou que tiña “temor a que lle puidese causar algún tipo de lesión auditiva”.
O xuíz sinala na sentenza que “ben é certo que a súa reacción quizais sexa un tanto desproporcionada”, pero salienta que “en ningún momento alcanza a intensidade suficiente como para ser considerada delituosa”.
Pérez Jácome, tras coñecer a sentenza asegurou a través de twitter que se trataba "doutra denuncia sen base".
⚖️ Otra DENUNCIA SIN BASE:
— Gonzalo Pérez Jácome -Alcalde de Ourense- (@gonzalojacome) January 19, 2023
Sentencia fresca del Juzgado: me ABSUELVEN hoy jueves, tras el juicio de este martes, por el episodio de la Sindicalista y su Megáfono.
Todos los ataques de la prensa, la oposición política y el establishment, quedan de nuevo en evidencia.
"Todos os ataques da prensa, a oposición política e o establishment, quedan de novo en evidencia", conclúe o alcalde de Ourense.
.png)
