Acondicionan en Barreiros un hórreo centenario como cuarto para uso turístico

Dende fóra semella un de tantos hórreos que se ven en calquera comarca gandeira galega. Pero dentro acolle un dos máis particulares cuartos que hai en Galicia. E é que moi pouca xente terá durmido nunha destas construcións concibidas para almacenar cereais. Imposible vivir máis intensamente a experiencia rural.

"Conservamos as actividades agrogandeiras para que a experiencia non só sexa durmir no cabazo, senón somerxerse na experiencia rural plena", Camilo Piñeiroa, Abrigadoiro de Rexa.

Todo canto hai no cuarto tivo que ser feito á medida, xa que non existen mobles pensados para colocar nun hórreo. Por tratarse dun elemento catalogado e de máis de cen anos, houbo que ser moi coidadosos coas obras e os materiais, algo que tamén lle da un plus a esta chamada 'suite do cabazo'.

"Tivemos que seleccionar moi ben todos os elementos da construción. Aquí non hai nada industrial. O que non se utiliza deteriórase, e é o que queremos evitar."

Nesa liña de aproveitar espazos en desuso, xa traballan en rehabilitar un muíño e os antigos cortellos das vacas para convertelos en lugares onde pasar a noite.