Acordo político na UE para que mozos de 17 anos podan conducir acompañados dun adulto experimentado

O Consello da UE e o Parlamento Europeo alcanzaron este martes un acordo político sobre as novas normas relacionadas co permiso de conducir que permitirá a mozos de 17 anos manexar vehículos, mesmo camións e furgonetas, se van acompañados por un adulto experimentado.

O texto acordado inclúe unha reforma integral da directiva sobre permisos de conducir co obxectivo de reforzar a seguridade viaria en Europa, onde cada ano morren unhas 20.000 persoas en accidentes de tráfico. Entre as principais novidades do pacto, que aínda debe formalizarse para ter carácter oficial, figuran a dixitalización do permiso de conducir, a introdución dun período de proba para condutores noveis e a harmonización de normas para toda a UE.

Coa actualización da normativa, o permiso de conducir de todos os europeos estará tamén dispoñible en formato dixital a través do moedeiro electrónico europeo, aínda que os Estados membros terán cinco anos e medio para implementalo e manterase o dereito para solicitar un carné físico.

As regras tamén cambian para os aspirantes a condutores, que terán que formarse en aspectos clave da seguridade viaria, como o uso do móbil ao volante, os perigos dos ángulos mortos, a correcta apertura de portas, o funcionamento de sistemas de asistencia á condución ou a condución en condicións adversas como neve ou xeo. Os futuros condutores tamén poderán coller o coche desde os 17 anos se van a acompañados dun condutor maior e experimentado.

Ademais, e por primeira vez a escala comunitaria, establecerase un período de proba de polo menos dous anos para os novos condutores no que se lles aplicarán normas e sancións máis estritas se conducen baixo os efectos do alcol ou drogas ou se non utilizan o cinto de seguridade ou sistemas de retención infantil.

Nun intento para paliar a escaseza de profesionais do transporte na UE, a normativa revisada reducirá a idade mínima para conducir camións de 21 a 18 anos, e a de autobuses de 24 a 21 anos, sempre que se dispoña do correspondente certificado de aptitude profesional. Así mesmo, os estados poderán autorizar que mozos de 17 anos conduzan camións ou furgonetas dentro do seu territorio nacional se o fan baixo a supervisión dun condutor experimentado. Antes de obter por primeira vez o permiso, esixirase un recoñecemento médico que inclúa un exame da vista e unha avaliación cardiovascular.

Con todo, para turismos e motocicletas, os países poderán substituír os controis médicos por formularios de autoavaliación ou, en renovacións, por medidas alternativas. En canto á duración dos permisos e os controis médicos, os carnés de moto e coche terán unha validez de 15 anos, aínda que os países poderán reducila a 10 anos se o documento utilízase como identificación nacional. No caso de camións e autobuses, o permiso deberá renovarse cada cinco anos e para condutores maiores de 65 anos, os estados poderán establecer períodos de validez máis curtos.

"A nova directiva sobre o permiso de conducir facilita a vida aos cidadáns: é dixital, máis flexible e menos burocrática. Ao mesmo tempo, enviamos un sinal claro a favor dunha maior seguridade viaria", declarou nun comunicado a relatora do texto, a eurodeputada alemá ecoloxista Jutta Paulus.

O acordo preliminar debe ser agora ratificado formalmente polo Consello e o Parlamento Europeo e, a partir de entón, os estados membros terán un prazo de catro anos para adaptar a súa lexislación nacional e prepararse para a súa aplicación. A ONG Consello Europeo de Seguridade no Transporte (ETSC) celebrou que o acordo rebaixase a proposta inicial exposta pola Comisión Europea en 2023, que pretendía que todos os estados membros estivesen obrigados a permitir que os mozos de 17 anos puidesen conducir camións pero o acordo final deixa esa medida como opcional.

"Permitir que adolescentes conduzan camións aos 17 anos é, e sempre foi, unha idea terrible. Os datos de varios países mostran que os condutores novos de vehículos pesados teñen moitas máis probabilidades de sufrir accidentes. Instamos os Estados membros a non aplicar esta opción", declarou a directora de políticas do ETSC, Ellen Townsend.