Activan o plan invernal de estradas estatais en Galicia
Activan o plan invernal de estradas estatais en Galicia
O operartivo contará con máis de cen quitaneves e case 20.000 toneladas de sal e estenderase ata o 30 de abril para a xestión de máis de 2.500 quilómetros de vías estatais ante meteoroloxía adversa
O Ministerio de Transportes destinará a Galicia 309 persoas, 104 quitaneves, 19.914 toneladas de sal e 3.257.000 litros de salmoira para a conservación e xestión dos máis de 2.500 quilómetros de vías estatais na comunidade autónoma, a través da activación do plan invernal na rede de estradas do Estado.
Foi tras a firma do protocolo presidida polo delegado do Goberno en Galicia, Pedro Blanco, polo que se activa o citado plan para a campaña 2024-2025. E co obxectivo de establecer a organización e os procedementos de actuación dos servizos, medios e recursos da Administración Xeral do Estado dispoñibles no ámbito galego ante a predición de situacións climáticas extremas.
Todo iso para asegurar a correcta circulación na Rede de Estradas do Estado, "reducindo en todo o posible o número de tramos con restricións ao tráfico e evitando as retencións de vehículos ou, no seu caso, minimizando a súa duración ante fenómenos climatolóxicos adversos", informa a Delegación do Goberno.
Para este operativo, que se estende ata o 30 de abril de 2025, Blanco avanzou que o Goberno dispón de 104 máquinas quitaneves, 19.914 toneladas amoreadas de sal e 3.257.000 litros de salmoira.
A cantidade de sal e de salmoira corresponde ás "provisións iniciais" e iranse repoñendo a medida que avance a campaña. En relación aos medios humanos, o delegado informou da mobilización de 309 persoas - entre condutores, técnicos e operarios - para garantir a vialidad das estradas e a súa conservación.
A eles poderanse sumar, cando sexa preciso, os 900 axentes da Agrupación de Tráfico da Garda Civil e o persoal da Dirección Xeral de Tráfico na Comunidade.
Do mesmo xeito que en anos anteriores, o protocolo establece un dispositivo para garantir a seguridade na área afectada polas obras no viaduto do Castro, na A6, ao seu paso por Pedrafita.
Neste sentido, Blanco subliñou que o Goberno decidiu manter o reforzo de tres quitaneves na zona que se suman aos medios habituais do Centro de Conservación de Pedrafita. Ademais, insistiu en que o Executivo central traballa coa previsión de que "antes de fin de ano quede restablecida a totalidade da vía".
Ao mesmo tempo, mantense a colaboración coa Axencia Estatal de Meteoroloxía (Aemet) no seguimento dos episodios de meteoroloxía adversa. A través desta cooperación, as persoas responsables do dispositivo poderán dispoñer de datos "en tempo real" da evolución das predicións para poder tomar "decisións operativas con máis rapidez e efectividade".
