Controlado o incendio na planta da empresa Sogarisa nas Somozas

Os bombeiros traballaron durante horas ata conseguir controlar o lume.

O incendio comezaba ás catro e vinte desta tarde na planta que a empresa Sogarisa ten no polígono industrial das Somozas... As instalacións están dedicadas á reciclaxe de residuos industriais.

No lugar rexistráronse varias explosións, que precederon ao comezo das lapas que afectaron a unha zona en que se almacenaban diferentes produtos.

"Pois en pouco tempo as chamas impresionaban moito, moito fume, o incendio agora está practicamente apagado, están arrefriando as zonas onde foi o máis forte do incendio, pero está controlado e practicamente apagado", di Juan Alonso Tembrás, alcalde das Somozas.

No momento do incendio estaban na planta varios traballadores. Dous operarios resultaron feridos e foron trasladados a un centro hospitalario pola inhalación de fume. 

"Estivemos falando con eles, cos que estaban traballando, levando o control da planta, uns estaban un pouco nerviosos, leváronos na ambulancia para facer unha revisión, pero estaban ben", engadiu o alcalde.

Debido ao alcance do incendio e a virulencia das lapas, a Xunta activou o nivel 1 do Plan Territorial de Emerxencias de Galicia, o Platerga. Sobre as 1:15 horas deuse por finalizada a actuación dos bombeiros, polo que esta mañá desactivouse o plan de emerxencias.

O 112 mobilizou os Bombeiros do Eume, con sede nas Pontes, o GES de Ortigueira, Bombeiros de Ferrol e os efectivos de extinción de Barreiros (Lugo), ademais da Garda Civil.

Tamén se solicitou a colaboración do Servizo de Prevención e Extinción de Incendios e Salvamento (SPEIS) de Narón e do corpo de Bombeiros de Vilalba.

Despregouse un perímetro de seguridade para que ninguén se achegase ás instalacións.Haberá que esperar aos resultados da investigación para determinar as causas do incendio.