Adif adxudica por 40 millóns o enlace ferroviario que unirá Galicia con Valladolid, o Cantábrico e Cataluña en alta velocidade

O Ministerio de Transportes e Mobilidade Sostible, a través de Adif AV, adxudicou por 40 millóns de euros (IVE incluído) as obras de construción do bypass de Olmedo, unha ligazón de 8,2 quilómetros entre a liña de alta velocidade (LAV) Madrid-Valladolid e a LAV a Galicia. Este proxecto "permitirá viaxar pola metade norte do país sen necesidade de pasar por Madrid, xa que conectará directamente por alta velocidade Galicia con Valladolid e, desde esta cidade, con outras capitais de Castela e León, Asturias, Cantabria, País Vasco ou Barcelona".

Trátase dunha actuación que "impulsará a transversalidade da maior rede de alta velocidade de Europa, con 4.000 quilómetros, así como a cohesión e vertebración territorial, ademais, comprende a plataforma da nova conexión, e inclúe os movementos de terreo e as estruturas".

En posteriores licitacións abordarase a montaxe de vía e os sistemas de electrificación, sinalización e comunicacións, segundo informou o Ministerio de Transportes e Mobilidade Sostible a través dun comunicado de prensa a Europa Press.

Para a construción do bypass o Ministerio aproveitará o U que debuxa a bifurcación da LAV Olmedo-Zamora-Galicia, a partir da LAV Madrid-Segovia-Valladolid: partirá da LAV a Galicia para, tras discorrer polos termos de La Zarza, Olmedo e Hornillos de Eresma, enlazar coa LAV Madrid-Valladolid.

Esta conexión realizarase mediante un trazado recto con extremos en curva para a súa conexión con cada unha das dúas liñas, asemellándose a un U, e no seu tramo central construirase un viaduto para cruzar o río Adaja. Tamén se executará unha pérgola sobre a estrada CL-602 e nunha primeira fase, o bypass contará con vía única, aínda que quedará preparado para tender a segunda vía.

A actuación, adxudicada a Vías y Construcciones, complétase coa construción de catro pasos superiores e un paso inferior "para garantir a permeabilidade na zona, drenaxes e cerramentos".

Por outra banda, estas actuacións "reforzan a vertebración e cohesión territorial, a través dun medio de transporte sostible e contribúen aos Obxectivos de Desenvolvemento Sostible (ODS)".