Adif avanza na variante exterior de Ourense coa montaxe do taboleiro do viaduto

Adif Alta Velocidade destacou o avance na construción da variante exterior de Ourense, duns oito quilómetros de lonxitude, coa montaxe do taboleiro que soportará a dobre vía do AVE dun dos maiores viadutos da liña entre Taboadela e Seixalbo.

Trátase, indicou o administrador ferroviario, dun viaduto de 356 metros de lonxitude e 43 metros de altura, que sortea a estrada N-525 e o río Barbaña, o segundo de maior lonxitude do trazado, que se realizou a continuación doutra das estruturas máis relevantes desta actuación, o túnel de Rante.

Cun investimento de 125,5 millóns de euros, Adif explicou que este tramo Taboadela-Seixalbo ten como finalidade dar "continuidade á plataforma da liña de alta velocidade Madrid-Galicia a partir de Taboadela, con dobre vía electrificada en ancho estándar" e reforzar así as conexións ferroviarias entre a comunidade autónoma e o centro peninsular.

Adif traballa tamén na canalización do río Seixalbo baixo a liña de alta velocidade e a convencional, e xa completou dous pasos inferiores; un deles, canaliza o Camiño de Santiago.

O outro treito, o que conecta Taboadela co túnel de Rante (5,6 quilómetros) tamén avanza e os traballos céntranse na escavación da súa principal estrutura, o túnel de Rante, desde as bocas sur e norte, e mais da galería transversal.