Alemaña prohibe coitelos en eventos públicos, trens e buses e axiliza as deportacións

O Goberno alemán acordou este xoves un paquete de medidas sobre política de seguridade e política migratoria, como reacción ao atentado con coitelo que deixou tres mortos a semana pasada no oeste do país.

O atentado foi perpetrado supostamente por un cidadán sirio que debera ser deportado con anterioridade e que xurou lealdade ao grupo xihadista Estado Islámico.

A ministra do Interior, a socialdemócrata Nancy Faeser, anunciou nunha rolda de prensa que se prohibirá portar coitelos en eventos públicos e outorgarase aos estados federados competencias para facer o propio en zonas cunha elevada criminalidade, así como en trens e autobuses.

A policía federal realizará controis aleatorios para vixiar o cumprimento da prohibición, explicou Faeser na comparecencia en Berlín, na que estiveron presentes tamén o ministro de Xustiza, o liberal Marco Buschmann, e unha representante do vicechanceler, o verde Robert Habeck.

As autoridades tamén serán dotadas con "competencias extras" para impulsar a "loita contra o islamismo", explicou a ministra.

Así, permitirá á policía por exemplo usar software de intelixencia artificial (IA) para facilitar a procura de sospeitosos en redes sociais en base a datos biométricos.

Tamén se creará un grupo de traballo para a prevención do islamismo radical que se centrará entre outros aspectos na radicalización de actores solitarios a través de Internet.

No ámbito da política migratoria, as medidas centraranse en axilizar as deportacións de solicitantes de asilo que xa rexistraran peticións noutros países europeos, como foi supostamente o caso do atacante de Solingen.

"Dábanse os requisitos legais e a deportación estaba preparada", afirmou Buschmann en relación ao detido e explicou que naquel caso a deportación fracasou porque non o puideron atopar e, tras expirar os prazos, Alemaña converteuse en legalmente responsable de "mantelo e aloxalo".

Por iso se creará un grupo de traballo que tentará facilitar estes procesos e eliminaranse as prestacións para estas persoas que están á espera de ser deportadas a outro país europeo.

"Hai que deportar máis rápido e deportar máis eficazmente", asegurou o titular de Xustiza, tras sinalar que hai "decenas de miles" de deportacións posibles legalmente que fracasan cada ano porque non se pode localizar ao individuo en cuestión.

Outras medidas de política migratoria pasarán por endurecer os criterios para deportar a persoas que cometesen actos de violencia con coitelos e seguir traballando para facer posibles as deportacións de criminais convictos a Siria e a Afganistán, o que agora mesmo non sucede debido á ausencia de relacións diplomáticas con eses países.

O xefe a oposición, o presidente da Unión Cristiá Demócrata (CDU), Friedrich Merz, ofrecéralle ao chanceler Olaf Scholz buscar un acordo para tomar medidas para restrinxir a migración irregular despois do atentado de Solingen.

Scholz despois anunciara a creación dun grupo de traballo, con representantes da oposición e dos gobernos rexionais, para acordar medidas dirixidas a reducir a inmigración irregular e aumentar a seguridade.

Nese contexto, o paquete de medidas acordado polos tres partidos da coalición de Goberno -o Partido Socialdemócrata (SPD), Os Verdes e o Partido Liberal (FDP), pode ser un paso previo ás negociacións coa oposición.