Alumnos do CIFP As Mercedes de Lugo están construíndo un avión
Alumnos do CIFP As Mercedes de Lugo están construíndo un avión
Enmárcase no Proxecto Innova e os alumnos practican fóra do horario escolar
A engrenaxe de todos eles é Luís, un namorado da aviación que é profesor nas Mercedes dende que hai sete anos comezou o ciclo de mantemento aeromecánico.
As ansias de voar véñenlle no sangue pola súa familia: o seu avó foi cofundador do aeroclub de Lugo, que agora preside o seu pai.
Luís, como profesor, trata de transmitirlles esa mesma paixón polos avións aos seus alumnos.
Neste ciclo apréndenlles aos alumnos a facer o mantemento dos avións tripulados e, tamén, a pilotar drons. Construír este avión é un incentivo que lles ocupa moitas horas fóra das lectivas.
Construír o avión levaralles unhas mil horas.
Trátase dun modelo bipraza configurado en tándem con motor eléctrico con baterías, por ecoloxía e consumo. Toda unha aprendizaxe para os alumnos.
O reto de construír este avión e facelo voar vai parello a conseguir manter motivado e formado o alumnado. De feito, todos os rapaces que remataron o ciclo nas promocións anteriores están contratados por empresas de aeronáutica.
