Ana Peleteiro e Adrián Ben, na lista para o Europeo por equipos de Polonia

España acudirá ao Campionato de Europa por equipos, integrado nos Xogos Europeos que se celebran en Silesia (Polonia) do 20 ao 25 de xuño, cun equipo de 46 atletas de máximo nivel entre os que destacan Ana Peleteiro, medallista de bronce en triplo salto nos Xogos Olímpicos de Tokio 2020, e Mohamed Katir, subcampión europeo de 5.000 metros en Múnic 2022.

España, encadrada na Primeira división con outros quince países, competirá os tres últimos días dos Xogos Europeos, do 23 ao 25 de xuño. Este Campionato de Europa por equipos, que en 2025 celebrarase en Madrid, supoñerá o regreso á competición internacional, quince meses despois, da plusmarquista española de triplo salto Ana Peleteiro. Farao tras ser nai por primeira vez o pasado mes de decembro e con vistas ao Mundial de Budapest (Hungría) de agosto.

Outro dos grandes referentes de España en Polonia será Adrián Ben, cuxa última carreira coa camiseta vermella saldouse coa medalla de ouro no Europeo en pista cuberta de Istambul o pasado mes de marzo.