Analizan, na cidade das TIC da Coruña, como eliminar os sesgos de xénero na IA

Karina Gibert é catedrática de intelixencia artificial e fai referencia nestas xornadas a un estudo que di que as mulleres teñen un 17 por cento máis de probabilidades de morrer en accidente de tráfico. Explica que hai razóns de deseño da posición de condución, e que as probas ata hai pouco realizábanse con bonecos que  reproducen a fisionomía masculina. Un exemplo, din, da necesidade de que os nesgos de xénero se eliminen á hora de programar. Ou senón, que se corrixan a posteriori.

"É certo que hai unhas guías básicas para facer o sistema con boa intención e respectar normas, pero a intelixencia artificial para avaliala hai que ir ao resultado. Atacala, ver como responde e aí xulgar se ten nesgo ou non", asegura Antonio Rodríguez del Corral, presidente do Cluster TIC Galicia. 

Falouse de que Big Data: moitos datos, non significa bos datos, porque en Internet hai menos datos de xente maior e con menos recursos. Datos como os de xénero, non desagregados, poden dar lugar a discriminación porque, por exemplo, as empresas usan intelixencia artificial na selección e promoción do persoal.

"Se eses programas de selección de persoal os deseña un determinado sector da poboación que son, maiormente, homes, enxeñeiros, dunha determinada idade e de raza branca pois seguramente esa selección de persoal será un pouco conforme á súa forma de ser", asegura Elena Mancha, directora xeral de Relacións Laborais.

É importante, engaden, que haxa máis mulleres accedendo a estudos de programación. O foro clausurouno este mediodía a conselleira de Emprego e Igualdade, Elena Rivo.