Arde sen previo aviso un coche que circulaba por Santiago

Lapas, explosións e unha intensa fumareda negra. O sobresalto causado polo incendio dun coche no barrio de Vista Alegre foi considerable. Tanto que algúns veciños chegaron a temer que aquilo acabara en desgraza.

"Houbo un momento que parecía que o incendio podía escapar do sitio. As lapas eran moi altas cando acadaron os asentos. Pero por sorte non pasou nada", di un veciño.

Pasaban das seis da tarde cando a clienta dunha das terrazas observou que un coche que circulaba pola rúa estaba empezando a arder polo baixo dianteiro. Berrou para advertir do perigo, pero non a escoitaron.

"Escoitei un berro dicindo que apartaran ou algo así. Saín á ventá e xa vin que había un coche azul que tiña fume no baixo e ardía. Primeiro pouca cousa, pero despois..., buff, ardía todo".

O condutor e o acompañante caeron na conta do que sucedía cando estoupou o primeiro pneumático, e lograron saír a tempo e ilesos. Os bombeiros sufocaron o incendio rapidamente, pero a intensa fumareda obrigou a cortar a circulación.

Unha avaría no motor é a causa máis probable deste aparatoso incendio que calcinou o vehículo ante a atónita ollada dos seus ocupantes.