Arraigo á Terra agrupa xa medio cento de produtores do oriente ourensán

Luís leva 35 anos elaborando bicas en San Xoán de Río. Vai xa para dúas décadas que  decidiu vender fóra para facer viable o negocio. Agora produce entre mil e mil cincocentas unidades ao día deste doce típico da zona.

Luís Castro, xerente de Bicas O Campo: "No rural xa non vai quedando xente e temos que buscar alternativas. Cantas máis opcións teñamos para vender, mellor".

É un do medio cento de produtores que forman parte xa de Arraigo á Terra, unha plataforma dixital en que podemos atopar todo tipo de produtos. Tamén a cosmética natural elaborada unha parella de emprendedores, orixinarios de Valencia, que decidiron apostar polo rural do oriente ourensán para desenvolver o seu proxecto.

Zaira Vidal, xerente de Piel Natura: "Aquí podemos reconectar coa natureza e a xente trátanos como se fósemos familia".

Un rural que trasladan aos seus produtos. Nos montes do oriente ourensán recollen parte das herbas que empregan.

A través da plataforma dixital, calquera pode coñecer non só os seus produtos senón tamén os concellos onde se elaboran e mercalos. Arraigo á Terra botou a andar a finais do ano pasado.
Agora queren dar un paso máis promocionando o consumo de proximidade e implicando os veciños no seu repartimento, como comenta unha das coordinadoras do proxecto, Susan Vázquez. 

Iniciativas para fortalecer a economía local e lograr que zonas rurais coma estas poidan seguir vivas.