Arranca o ano da ansiada normalidade, por Venancio Salcines

Se dalgunha maneira se pode definir este ano é como o da aterraxe, ou, dito doutro modo, como o da recuperación do equilibrio nas constantes vitais. E, se ben é certo que acabaremos o ano dese xeito, o que non está nada claro é en que momento tocaremos terra.

Existe un amplo consenso sobre que a inflación, tanto a xeral como a subxacente, acadará niveis próximos ao dous por cento, e isto só pode levar a unha dirección, un cambio na política monetaria. Neste xeito dáse por seguro que veremos baixadas nos xuros que ten que asumir o financiamento privado, pero de novo xorde a inquedanza de cando.

Aquí a maioría dos expertos, como afirmaba hai uns días o gobernador do Banco de España, apostan a que o veremos no terceiro trimestre. É dicir, ben durante o verán ou a finais deste. Se está a pensar na súa hipoteca, entón toca falar do Euribor e non dos tipos de referencia do Banco Central Europeo, e aquí contamos coa característica de que o interbancario europeo desconta o futuro, é dicir, anticipa a baixadas dos xuros oficiais. Por iso dende o mes de outubro estamos a ver baixadas do tipo a doce meses, é dicir, da referencia das hipotecas.

Asemade, tamén observaremos unha leve pero visible recuperación da economía alemá, motor tractor de Europa e clave nas exportacións de Stellantis e de Inditex. A estabilidade dos prezos enerxéticos, que parecen que nos acompañarán durante este ano, están a ser claves na recuperación de Europa Central, polo tanto debemos ter sempre posta unha ollada na política de prezos da Organización de Países Exportadores de Petróleo (OPEP) e na demanda mundial. E aquí as expectativas son positivas. A China, cun crecemento moderado, non ten capacidade para tensionar os prezos e a OPEP está moi dividida, o que leva a que non exista consenso cara a reducir a produción e, polo tanto, provocar un exceso de demanda.

Os riscos máis grandes que temos están no marco xeopolítico, esencialmente nunha extensión do conflito Hamas-Israel e en que este se estenda ao estreito de Tirán, boca do Canal de Suez, ou ao estreito de Ormuz, e se entorpeza o comercio mundial de mercadorías. Polo tanto, mentres a situación xeopolítica en Oriente Medio o permita, o mundo neste ano só vai cara a un lugar, a estabilidade e a moderación, en prezos e en crecemento.