190 alumnos de FP competirán en Silleda por ser os mellores da Galiciaskills 2023

A Galiciaskills volve a Silleda tras a parada da pandemia. Esta sétima edición das olimpíadas da FP volve aglutinar todas as probas nun mesmo recinto. De aquí sairán os nosos representantes para o certame nacional e Galicia nunca decepciona.

 "No campionato mundial que se celebraba o ano pasado no Worldskills, Galicia conseguiu unha medalla de bronce, que é a primeira medalla que consegue o equipo español nun campionato mundial", apunta Mª Eugenia Pérez, directora xeral de Formación Profesional.

Participan en 24 especialidades case 200 alumnos de 84 centros de toda Galicia. Dende hoxe e ata o venres poñerán a proba as súas destrezas.

"Teriamos que facer os patróns, facer toda a marcada que é o que me están corrixindo agora e despois teriamos que coselo todo no menor tempo posible e acabando a prenda cos menores erros posibles", explica Ángela Vila, alumna do ciclo superior de Vestiario á Medida.

Todos eles levan meses adestrándose, un traballo intenso que non sería posible sen a implicación do profesorado

"Son os mellores, son os que nos ensinan todo e os que están facendo posible que nós poidamos estar aquí ao final", recalca Ángela Vila, alumna do ciclo superior de Vestiario á Medida

"Estamos traballando con eles todo o mes de setembro e outubro, eu saía da casa ás sete e chegaba ás dez e media. Xa che digo abondo", puntualiza Avelina Amado, profesora no CIFP Paseo das Pontes

"Estanse formando, na actualidade,  o maior número da nosa historia, 64.500 alumnos están matriculados na FP e estamos constantemente intentando mellorar, de feito no orzamento deste ano duplicamos a partida de FP porque estamos seguros que é fundamental para os alumnos e para que as empresas poidan dotarse do máis importante, que é ter recursos humanos ben preparados, ben cualificados e con capacidades e destrezas en base ás demandas que ten a actual economía", expón Román Rodríguez, conselleiro de Cultura, Educación, FP e Universidades.