Arrinca o reconto do voto da emigración, que podería facer variar un escano en Ourense
Arrinca o reconto do voto da emigración, que podería facer variar un escano en Ourense
O PSOE podería lograr un segundo deputado pola provincia á conta do PP ou do BNG
A Arxentina e Suíza son os países desde os que máis galegos na emigración emiten a súa papeleta
Rueda agarda un "apoio importante" do voto exterior ao PPdeG
![Reconto do voto CERA en Ourense](https://img-g24-crtvg.flumotion.com/prog24/2024/20240226/RECONTOVOTOCERA.png)
O reconto dos votos do Censo Electoral de Residentes Ausentes (CERA) arrincará este luns, día 26 de febreiro, e poderá facer variar un escano na provincia de Ourense, onde o PSOE podería lograr un segundo deputado á conta do PP ou do BNG.
En concreto, segundo os datos da Xunta Electoral, uns 29.300 galegos emitiron o seu voto desde a emigración, dos cales case 6.150 o fixeron con destino á provincia de Ourense, a única en que un escano podería variar tendo en conta que o Partido Socialista quedou a 112 sufraxios de obter un segundo escano.
O PSOE podería lograr un segundo deputado por Ourense
A provincia da Coruña é a que máis votos recibe do exterior, con 10.924 papeletas emitidas, seguida pola de Pontevedra, con case 8.826 sufraxios. Por detrás sitúase a de Ourense, onde as arredor de 6.150 papeletas pendentes de reconto poderían mover o taboleiro debuxado o domingo en beneficio do PSOE, tendo en conta que quedou a 112 votos de obter un segundo deputado pola provincia, que elevaría a representación dos socialistas no Pazo do Hórreo a 10 parlamentarios. Pola súa banda, case 3.300 persoas residentes ausentes votaron na provincia de Lugo.
A Arxentina e Suíza son os países desde os que máis galegos na emigración emiten a súa papeleta
O país que máis votos emite é A Arxentina, con 7.900 votantes, e é a provincia da Coruña a maior destinataria, con máis de 2.700, seguida por Pontevedra cuns 2.400. Por detrás sitúanse Lugo e Ourense, cuns 1.300 cada unha.
Un total de 4.476 persoas emitiron o seu voto desde Suíza. En concreto, 2.123 fixérono á provincia da Coruña, 377 a Lugo, 1.047 a Ourense e 929 a Pontevedra. Pola súa banda, 11 figuran como descoñecida.
Ademais, desde Francia depositaron a súa papeleta 2.331 persoas, das cales 526 fano na provincia da Coruña, 796 na de Pontevedra, 720 en Ourense e 278 en Lugo.
Desde O Uruguai votaron unhas 2.300 persoas, e foron tamén as de Pontevedra e A Coruña as provincias que máis recibiron, con 1.231 e 737 sufraxios. En terceiro lugar sitúase Ourense, con 212, e en cuarto Lugo, con 153.
Nos consulados de Venezuela contabilizáronse 1.840 votos, e é neste caso tamén a provincia da Coruña a que máis recibe: 589. Por detrás sitúanse Ourense, con 556; Pontevedra, con 473, e Lugo, con 222.
O reconto non afecta á maioría do PPdG
Aínda que un escano poderá bailar en Ourense, un posible cambio na repartición de deputados non afectaría á maioría absoluta do PP. Nas eleccións do 18 de febreiro, os populares, encabezados por Alfonso Rueda, fixéronse con 40 deputados, dous máis dos necesarios para obter a maioría absoluta no Pazo do Hórreo.