As 22.500 doazóns de sangue no verán permitiron realizar 11.300 intervencións en Galicia

Galicia é a quinta comunidade en doazón de sangue, unha posición que se consolida cos datos da campaña de verán. Dende xuño recolléronse case 22.500 doazóns, que permitiron realizar 11.300 intervencións cirúrxicas e transfundir plaquetas a máis de 5.600 pacientes oncolóxicos.

"Foi unha boa campaña, empezamos o Día Mundial do Doador de Sangue, estamos aínda inmersos ata mediados de mes, e os resultados foron bos", asegura a directora da Axencia Galega de Doazón de Órganos e Sangue. E o conselleiro de Sanidade quixo incidir na elevada taxa de doazón dos ferroláns: "Un recoñecemento especial á xente de Ferrol, solidaria, estamos por riba da media galega en doazóns, cunhas 47 por mil habitantes e ano".