As deficiencias do servizo de telefonía en Portugal continúan despois do ataque cibernético

Se visitaron ou foron traballar onte ou hoxe a Portugal probablemente notasen que existen algúns problemas de conexión co seu teléfono móbil. A razón é que unha das maiores empresas de telecomunicacións do país, Vodafone, sufriu un ataque cibernético deixando millóns de usuarios sen servizo. A maioría dos clientes recuperaron por completo a rede tanto de voz como de datos, pero aínda persisten problemas de conectividade co 4G, unhas deficiencias que os móbiles galegos tamén sofren ao conectarse a Vodafone se visitan Portugal.

Concretamente catro millóns e medio de clientes víronse afectados por este ataque á empresa Vodafone. Tanto as chamadas como Internet e a televisión deste servizo caían o pasado martes totalmente durante unha hora. Isto tamén afectou os móbiles dos galegos que cruzaron a raia ou que xa estaban aquí e que se conectan co roaming á rede Vodafone.

Dende a empresa din que tardarán unhas horas en restablecer os servizos totalmente, pero aseguran que os piratas non lograron obter datos de clientes.