As imaxes de satélite aumentan a superficie queimada en Galicia a 36.700 hectáreas
As imaxes de satélite aumentan a superficie queimada en Galicia a 36.700 hectáreas
Incrementa en 5.000 hectáreas os cálculos da Xunta
Só continúan activos os incendios do Courel, que se uniron nun só
Medio Rural dá por controlados ou estabilizados todos os incendios forestais en Galicia. O programa Copernicus, o sistema europeo de información de incendios, aumenta en 5.000 hectáreas as estimacións da Xunta sobre a superficie queimada nos incendios da semana pasada.
Serían 12.700 hectáreas en Valdeorras e 13.600 no Courel, a única zona con incendios aínda activos. Alí continúan traballando os equipos de extinción, por terra e aire, para evitar que reaviven as lapas. Pero o lume quedou estabilizado. E todos os veciños regresaron ás súas casas.
Dende o xoves pasado non ardeu máis superficie no Courel. Agora toca facer balance e intentar recuperar a normalidade.
Os veciños explican que os soutos axudaron a frear o avance das lapas, que perden forza ao bater cos castiñeiros.
O último parte de Medio Rural tamén confirma que quedou controlado o incendio de Outeiro, en Quiroga.
Segundo este último parte, os incendios forestais que afectan a Galicia son catro, dous estabilizados e dous controlados, con 28.350 hectáreas aínda ardendo. Dous dos incendios son na provincia de Lugo e dous na provincia de Ourense.
