As maiores complicacións no tráfico pola volta das vacacións espéranse para este serán

Medio millón de desprazamentos é a cifra prevista pola Dirección Xeral de Tráfico para as estradas galegas durante esta fin de semana por mor da operación de volta das vacacións.  E a maioría destas viaxes espérase para hoxe, especialmente de cara ao serán.

"A previsión é que dende as catro da tarde ata a medianoite os desprazamentos a Galicia aumenten", comenta Bruno Tato Varela, xefe do destacamento de tráfico do Porriño.

Segundo a Dirección Xeral de Tráfico, este mediodía a circulación na rede viaria galega está a rexistrar un aumento con respecto ás cifras habituais, aínda que está a ser fluída polo momento. As maiores complicacións esperánse nas vindeiras horas, nas entradas das cidades, nas vías de alta capacidade e tamén nos puntos de conexión coa meseta.

Tamén se está a prestar atención a tramos concretos, coma o alto do Fiouco, en Mondoñedo, que estivo pechado onte pola néboa e esta madrugada presentou problemas de circulación polas condicións meteorolóxicas. A Garda Civil de Tráfico intensificará a súa presenza nas estradas para facer fronte a calquera incidencia viaria.

"Contamos en toda a comunidade autónoma con máis de cincocentos axentes, que están despregados ao longo dos tres días, para mirar pola seguridade da xente, auxilio de quen precise a nosa axuda e vixiar os problemas que poidamos ter", asegura o xefe do destacamento do Porriño.

Nesta operación retorno xa se contabilizou un falecido nas estradas galegas, un home de 53 anos que foi atropelado cando transitaba onte á noite pola estrada no concello coruñés de Brión.

Por iso, os axentes de tráfico recomendan aos condutores moita prudencia, respectar as normas de circulación e evitar as horas de maior densidade circulatoria na medida do posible.