As monxas excomungadas de Belorado desvincúlanse da Pía Unión e din que "camiñan soas"

As monxas excomungadas de Belorado anunciaron que se apartan da Pía Unión do falso bispo Pablo de Rojas, a cuxa autoridade se acolleron tras abandonar a igrexa católica, e que, hoxe, "camiñan libres e soas" e non recoñecen máis autoridade que os tribunais de Xustiza.

Nun comunicado enviado a EFE tras a saída do convento de Pablo de Rojas e o seu portavoz José Ceacero por desexo das relixiosas, estas aseguran ter pleno dominio do mosteiro, no que desde antonte non están os dous representantes da Pía Unión, "de cuxa xurisdición nos apartamos", anuncian.

No comunicado, que facilitaron a EFE os seus avogados e que asinan as exmonxas, responden ás últimas declaracións do arcebispo de Burgos, Mario Iceta, e insisten en que a titularidade do mosteiro e a súa actividade dentro do mesmo é "unha cuestión puramente xurídica", que non depende da autoridade eclesiástica.

Por iso, engaden, "deberá ser dirimida polos Xulgados e Tribunais correspondentes".

Piden ao arcebispo que se reúna coa comisión negociadora, que conforman o bufete Sarabia e Asociados, GTRS e o avogado Florentino Alaez, para "dar unha solución extraxudicial ao conflito", que "satisfaga a todas as partes e evite tanto a presente situación como a xudicialización do asunto".