As novas instalacións do centro de recuperación de fauna de Lugo contan coa primeira instalación en Galicia para atender osos

O Centro de Recuperación de Fauna Silvestre do Veral, en Lugo, acaba de ampliar e renovar as instalacións cunha importante novidade: alberga a primeira sala de Galicia para atender osos pardos. Tras anos de traballo para a recuperación da especie nos montes galegos, o último censo contabilizou 11 exemplares que viven de xeito permanente nas provincias de Lugo e Ourense.

Aínda non ten ningún inquilino pero se fose preciso o oso pardo xa ten en Galicia unhas instalacións deseñadas especificamente para eles, para o caso de que necesiten atención para recuperarse dalgunha ferida ou doenza. As novas instalacións do centro de fauna salvaxe do Veral contan con cómodos locais para o plantígrado e cos máis modernos sistemas tanto para o seu transporte como para a protección, tanto do animal coma do coidador. 

Jesús Montouto, director territorial da Consellería de Medio Ambiente e Cambio Climático en Lugo, di que se trata dunha instalación onde colaboraron outras comunidades e a Fundación Oso Pardo. Déuselle moitas voltas para saber que era o máis adecuado para o oso.

Pero non só os osos se beneficiarán destas novas instalacións. O ano pasado os centros de recuperación de fauna atenderon en Galicia máis de 4.000 espécimes. A meirande parte deles son aves pero tamén mamíferos e réptiles. "Un de cada catro animais recepcionados aquí volve finalmente á vida silvestre".

Estamos precisamente na temporada de máis actividade porque a época de cría coincide coa primavera na maioría das especies. E con maior actividade e mobilidade, os accidentes son máis frecuentes.