Asturias pecha a entrada de vehículos privados aos lagos de Covadonga
Asturias pecha a entrada de vehículos privados aos lagos de Covadonga
O Principado revisará os permisos de acceso á zona e buscará mellorar a seguridade da vía
![](https://img-g24-crtvg.flumotion.com/prog24/2023/20230803/asturias-covadonga.1691070872.24.png)
O Principado de Asturias decidiu pechar totalmente, durante as vinte e catro horas do día, a entrada de vehículos privados aos lagos de Covadonga fóra dos adscritos ao plan especial de transporte que se pon en marcha nas datas de maior afluencia e dos que conten con autorización especial para circular.
Así o anunciou o conselleiro de Fomento, Cooperación Local e Prevención de Incendios, Alejandro Calvo, tras participar na reunión de seguimento do plan especial de transporte a raíz do accidente de autobús no que o luns resultaron feridas 49 persoas.
O obxectivo é que ningún vehículo poida interferir na circulación dos autobuses e taxis adscritos ao plan.
Calvo avanzou a posibilidade de construír algunha nova infraestrutura na estrada para facilitar as manobras dos buses.
Por último, o comité de seguimento decidiu reforzar o control das autorizacións especiais que teñen algúns usuarios, como gandeiros ou montañeiros.
A aplicación das medidas será inmediata, unha vez sexan publicadas no Boletín Oficial do Estado (BOE).
A xefa provincial da Dirección Xeral de Tráfico, Raquel Casado, recoñeceu que houbo "anomalías" que non quixo detallar e sinalou que están a estudar onde se deu o mal uso á hora de dar autorizacións para adoptar medidas correctoras.
Casado apuntou que a partir de setembro haberá unha nova aplicación para mellorar a xestión desas autorizacións
Pola súa banda, o xerente de Alsa, Javier dos Ríos, sinalou que xa están a traballar co Consorcio de Transportes e a administración para definir canto antes os "puntos de cruzamento seguros".