Atopan un cadáver aforcado que levaría seis meses morto nunha casa abandonada de Tui

A Garda Civil investiga en Tui o macabro achado por parte dun grupo de mozos dun cadáver que de momento non se puido identificar porque estaba xa case momificado. 

Os rapaces atoparon o corpo aforcado cun cable, irrecoñecible e sen sinais de violencia. A autopsia no Instituto de Medicina Legal aclarará se é un home ou unha muller, a idade e outros datos que permitan a súa identificación. Non axuda que esta sexa unha zona de paso de xente dun e doutro lado da fronteira. 

Son as últimas vivendas antes de cruzar o Miño cara a Portugal e moitas levan anos abandonadas. A ninguén lle sorprende que un cadáver levase tanto tempo sen que alguén se decatara.

O falecido carecía de documentación, polo que as autoridades están investigando no rexistro de desaparecidos na zona nos últimos tempos.