Atopan unha medusa xigante no porto de Muros

Os pescadores de Muros víronse sorprendidos ante a aparición dunha medusa xigante. Gravárona en vídeo de madrugada, cando andaban ás luras, e nun primeiro momento pensaron que se trataba dunha bolsa de plástico, pero non. Era unha augamar xigante, algo que non se ve con moita frecuencia na costa galega.

Cando o vento sopra do norte, pode chegar ata o noso litoral algún exemplar de 'Rhizostoma pulmo' como o que apareceu esta semana. O realmente inusual é que aparezan nesta época do ano. É unha consecuencia deste inverno tan atípico que estamos a vivir dende o punto de vista meteorolóxico.

As medusas xigantes habitan normalmente en augas frías, ao norte do golfo de Biscaia. Nas nosas praias é máis común atopar exemplares máis pequenos doutras especies procedentes do sur, como as medusas veleiro ou as carabelas portuguesas.