Berlusconi, en coidados intensivos por problemas cardiovasculares

O líder de Forza Italia e tres veces primeiro ministro de Italia, Silvio Berlusconi, atópase ingresado baixo coidados intensivos no hospital San Rafael de Milán.

O exmandatario, de 86 anos, está en situación estable aínda que ingresou con insuficiencia respiratoria, segundo adiantou a televisión pública Rai, que tamén informou de que se someteu a un TAC e está á espera doutras probas.

O líder de Forza Italia xa estivo hospitalizado nese hospital milanés desde o luns ao xoves pasado para "controis médicos", de acordo con fontes próximas ao político e empresario.

Berlusconi, dirixente da política italiana en tres mandatos diferentes e cuxa formación forma parte da coalición gobernante que lidera a ultradereitista Giorgia Meloni, ten implantado un marcapasos desde o 2006 e arrastra problemas de saúde.

En 2020 foi ingresado con coronavirus e unha pneumonía bilateral no San Rafael, aínda que foi dado de alta uns días despois, aínda que desde entón pasou en repetidas ocasións polo hospital.
A última, tamén no hospital San Rafael, foi en xaneiro de 2022 por unha infección das vías urinarias.