Betanzos celebra as vodas de prata da súa Feira Franca con máis días de festa
Betanzos celebra as vodas de prata da súa Feira Franca con máis días de festa
Un centenar de postos de artesanía e produtos gastronómicos animan as rúas
É unha das citas imperdibles do verán e este ano hai algo que a fai máis especial. Betanzos celebra o vinte e cinco aniversario da súa Feira Franca cunha programación ampliada e máis días de festa medieval.
Estes días puideron escoitarse na Cidade dos Cabaleiros berros en contra do señor de Andrade. Os ecos da revolta irmandiña interromperon o relato da intensa vida de María A Balteira, disque a soldadeira máis fermosa da Corte do Rei Sabio. A historia reinterprétase nas rúas, onde un centenar de postos de artesanía e produtos gastronómicos e ducias de escudos, estandartes e bandeirolas visten e animan a vida de Betanzos.
A Feira Franca representa para os betanceiros un segundo inicio do verán. Xa é un referente entre os mercados medievais que se recrean na comunidade e desde 2013 está declarada Festa de Interese Turístico de Galicia.
