Boas expectativas de vendima no Barbanza, cun 15 % máis de produción

A vendima comezou antes do habitual no Barbanza e a estas alturas xa son poucas as parcelas que quedan por recoller. A previsión é moi boa este ano, en cantidade e calidade. Os viticultores lograron frear a tempo os ataques de mildio e o tempo axudou a que madurase sa.

"Vén ben, a última chuvia deulle a vida, estaba en risco de secar, pero ao final, moi ben", explica Manuel Martínez, un viticultor de Ribeira.

"Foi toda unha sorpresa esta vendima porque en xuño atacou o mildio e pensabamos que viña minguada. Pero despois madurou moi ben, a vendima é máis proveitosa do agardado e a calidade é extraordinaria", engade Francisco Crusat, da adega Entre os Ríos da Pobra.

Todo o viño que fagan con elas está practicamente vendido, xa que hai máis demanda ca oferta para este caldos. O segredo está na orixinalidade de variedades como o raposo, a súa caste estrela. A velutina devora os acios, pero con trampas e unha rede, os viticultores van aprendendo a domala.

"Temos que buscar fórmulas. Eu póñolle trampas pero como moito entran o 10 % delas, e acaban cos acios de Raposo, que é de maduración temperá", lamenta Manuel.

"O compañeiro de adega Cazapitas puxo unha malla, que entra o sol e o aire pero non a velutina. Foi un experimento, pero dixo que deu un resultado extraordinario", comenta Crusat.

Cinco adegas de Pobra, Boiro, Rianxo, Padrón e Valga están acollidas á indicación Viños do Barbanza. Entre todas prevén vendimar uns 55.000 quilos de uva, fronte aos 53.000 do pasado ano. Toda unha marca de produción para estes pequenos viticultores.