Cae en España e noutros sete países a maior rede de narcoveleiros do mundo, con 50 detidos
Cae en España e noutros sete países a maior rede de narcoveleiros do mundo, con 50 detidos
Durante a operación Mentor, en que participaron once países, interviñéronse 1.500 quilos de cocaína, oito embarcacións, 36 vehículos e máis de 85 terminais telefónicos
O grupo preparaba dous veleiros para recibir 2.000 quilos de cocaína
![](https://img-g24-crtvg.flumotion.com/prog24/2024/20240719/NARCOVELEIROS.png)
A Policía Nacional desartellou a maior organización de narcoveleiros do mundo, que operaba entre Suramérica e Europa nunha operación conxunta levada a cabo en España, onde se asentaba, e noutros sete países, e nela foron detidas cincuenta persoas e intervidos 1.500 quilos de cocaína e oito embarcacións.
En España foron arrestados 26 presuntos integrantes da organización e leváronse a cabo trece rexistros en Málaga, seis en Valencia, cinco en Almería, dous en Alacant, un en Xirona e outro en Murcia.
Entre os detidos atópanse 16 noruegueses, dos que destaca un atracador de bancos e furgóns blindados que xa cumprira 15 anos de prisión e que desde hai un ano pasara a integrar este grupo pola súa experiencia delituosa e o respecto de que gozaba perante as mafias do leste de Europa.
Ademais, practicáronse trece rexistros en Noruega e outros en Bulgaria, O Reino Unido, Panamá, Trinidad e Tobago, Portugal e Colombia, países en que foron detidas outras 24 persoas, informa a Dirección Xeral da Policía.
A organización encomendábase a un santeiro para recibir a "bendición" e o éxito nas operacións de transporte de cocaína e ademais da droga e as embarcacións referidas interviñéronse 36 vehículos e 85 terminais telefónicos.
A investigación foi impulsada por un Xulgado de Arrecife (Lanzarote) e pola Fiscalía e o operativo foi liderado pola Policía Nacional española co apoio de autoridades de Noruega, Os Estados Unidos, O Reino Unido, Francia, Polonia, Portugal, Bulgaria, Panamá e Santa Lucía, ademais de Europol e do Centro de Análise e Operacións Marítimas en Materia de Narcotráfico europeo.
A investigación comezou en xuño de 2020
Iniciouse en xuño de 2020 conxuntamente coas autoridades do Reino Unido ao detectarse unha organización británica asentada en España, que contaba con canles de comercio internacional de tráfico de cocaína desde Suramérica a Europa a través de España.
Os investigadores identificaron os integrantes da organización e descubriron que dispoñían dun conglomerado de embarcacións que rexistraban a nome doutras persoas.
Pescudaron que a organización operaba en Tenerife, Gran Canaria, El Hierro e Lanzarote establecendo ligazóns marítimas ata Suramérica cos que creaban narcorrutas.
Á súa vez, desde o sur de España os responsables da organización coordinaban e dirixían os transportes de cada embarcación e mantiñan as reunións coas ligazóns dos países de orixe da droga.
O grupo preparaba dous veleiros para recibir 2.000 quilos de cocaína
O líder da organización, coñecido como o Profesor, que recrutaba os tripulantes dos veleiros, levaba operando no narcotráfico máis de vinte anos e contaba coa confianza plena dos cárteles colombianos e mexicanos cos que coordinaba o traslado do estupefaciente a España.
O diñeiro xerado por estes cargamentos era reinvestido en novas operacións e branqueado a través dun tecido empresarial que operaba en varios países.
Membros desta organización do grupo denominado Balkan Cártel levaban na costa do Sol un elevado nivel de vida e operaba con negocios empresariais que permitían dar saída aos beneficios que obtiñan da súa actividade ilícita.
Os axentes identificaron dez embarcacións que a organización tiña habilitadas para as narcorrutas e tiñan diferentes bases de operacións en España e Suramérica.
En España detectouse que utilizaban Valencia, Alacante, Almería, Málaga e As Canarias como puntos loxísticos antes de partir a Suramérica, onde se situaban no Brasil, Colombia, Güiana, Trindade e Tobago, Santa Lucía, Barbados e Panamá para manter os veleiros preparados á espera de recibir as ordes do Profesor e do seu lugartenente para saír a cargar o estupefaciente.
Os membros da organización realizaban as comunicacións para estas operacións con sistemas cifrados de seguridade, e nos niveis máis altos da trama cada un deles dispoñía de ata quince terminais telefónicos.
Os axentes detectaron a preparación de dous veleiros que ían recibir máis de mil quilos de cocaína cada un, polo que se estableceu unha acción para evitar que se levase a cabo a carga en augas internacionais e solicitouse auxilio xudicial en numerosos países.