Caen as primeiras crinas na rapa das bestas de Sabucedo
Caen as primeiras crinas na rapa das bestas de Sabucedo
O primeiro dos tres curros de Sabucedo celebrouse este sábado pola tarde
Cortaráselles a crina a preto de 230 bestas que tamén serán desparasitadas antes de volver ao monte
Bestas e aloitadores viviron esta tarde o primeiro dos curros nesta edición da rapa das bestas de Sabucedo.
Antes de chegar ao curro, hai días de traballo nos montes de Sabucedo, sobre todo, nas horas que preceden a rapa. Xuntar as bestas que viven libres no monte de Montouto, e guialas ata a aldea é unha das tarefas máis colaborativas da festa. O sábado pola mañá as máis delas xa estaba recollidas no Castelo.
Estamos no momento en que imos meter unhas poucas bestas máis e despois sacarémolas do peche para baixalas a Sabucedo. Aquí está toda a xente que sobe para ver a "baixa" das bestas.
1.800 persoas agardaban o primeiro curro da tarde cos aloitadores preparados para cortarlles a crina ás bestas.
Aquí faise cunha técnica que se mantén de toda a vida. Só poden ir tres persoas, non pode haber paus nin cordas, brazo con brazo e nada máis. A idea é deter o cabalo para poder rapalo e darlle o desparasitador. Son tres días, cada curro dura hora e media. A cada cabalo tócalle un minuto e logo son ceibes e van moito máis saudables e desparasitados, van vivir moito mellor o resto do ano.
Quedan por diante aínda outros dous curros, o de domingo ao mediodía e o do luns, despois as bestas volven ao monte.
