Casado admite que non contrastou a información sobre os alumnos castigados por falar castelán

O exlíder do PP Pablo Casado admitiu no Xulgado de Instrución número 29 de Barcelona que "non contrastou" as súas afirmacións de que en Cataluña se impide ir ao cuarto de baño aos alumnos que falan castelán. Dixo que as baseou no publicado na prensa, e aduciu que o seu obxectivo era denunciar a política lingüística do Govern.

O obxecto da querela son unhas declaracións que Casado fixo nun acto do PP en Galicia en decembro de 2021, no medio da polémica desatada a raíz da sentenza que impoñía un 25 % de clases en castelán, no que asegurou que en Cataluña "hai profesores con instrucións de non deixar ir ao lavabo a nenos porque falan castelán" e que a algúns alumnos póñenlles "pedras na mochila" por usar esa lingua no patio.

Casado, que non dubidou en afirmar ante o xuíz que "volvería" repetir as súas declaracións, escudouse en que estaba amparado pola inmunidade parlamentaria cando pronunciou esas palabras nun mitin do PP e afirmou que se sente vítima dun "trato diferencial" respecto aos deputados do Parlament, a quen non se persegue xudicialmente polas súas declaracións políticas.

O expresidente do PP, que só contestou as preguntas do xuíz e do seu defensa, presentou hai uns días un recurso contra a admisión a trámite da querela da Generalitat, alegando que se baseou en información "contrastada" e amparado pola liberdade de expresión e pola súa inviolabilidade como parlamentario. O xuíz instrutor, con todo, rexeitou o recurso de Casado.