Cerdedo-Cotobade decreta tres días de loito pola morte da muller agredida polo seu fillo
Cerdedo-Cotobade decreta tres días de loito pola morte da muller agredida polo seu fillo
A vítima permanecía ingresada no Hospital Álvaro Cunqueiro de Vigo debido aos golpes propinados polo fillo
O home, de 46 anos e veciño de Barro, foi detido por un delito de tentativa de homicidio e trasladado á unidade de psiquiatría do Hospital Montecelo de Pontevedra
O concello pontevedrés de Cerdedo-Cotobade decretou tres días de loito oficial tras o falecemento da veciña do municipio, de 79 anos, á que o seu fillo deu unha malleira o pasado 2 de xaneiro.
O consistorio local decretou loito oficial desde as 00:00 horas do 17 de xaneiro ata as 00:00 horas do 20 de xaneiro, durante os cales as bandeiras do Concello ondearán a medio mastro.
Tamén suspende todos os actos institucionais previstos para estas datas e mostra a condolencia e solidariedade da corporación e de todos os veciños de Cerdedo-Cotobade coa familia da veciña de Santa María de Sacos falecida.
A vítima permanecía ingresada no Hospital Álvaro Cunqueiro de Vigo, onde foi trasladada en helicóptero medicalizado de Urxencias Sanitarias 061 con prognóstico crítico debido aos golpes propinados polo seu fillo.
O home de 46 anos foi detido ese día por un delito de tentativa de homicidio tras propinar unha malleira á súa nai na parroquia de Santa María de Sacos.
Unha vez arrestado, o fillo, que reside habitualmente no municipio pontevedrés de Barro, foi trasladado á unidade de psiquiatría do Hospital Montecelo de Pontevedra á espera de declarar no xulgado.
.jpg)
.png)