Wofco compra Fandicosta e convértese na terceira empresa pesqueira de Galicia
Wofco compra Fandicosta e convértese na terceira empresa pesqueira de Galicia
Wofco asume uns 20 millóns de débeda
A Xunta aceptou ceder a súa participación a cambio do mantemento do 90 % dos empregos
Os sindicatos destacan o traballo en conxunto das partes implicadas
![Planta de Fandicosta](https://img-g24-crtvg.flumotion.com/prog24/2024/20240617/fandicosta.1718647966.68.jpg)
A operación de venda de Fandicosta pechouse este luns, tras meses pendente de varios trámites, tendo en conta que a pesqueira Wofco asinou xa a compra, semanas despois de que o xulgado mercantil aceptase o plan de reestruturación da empresa (en proceso concursal).
Segundo confirmaron fontes sindicais e a Xunta de Galicia (que posuía ata o de agora o 12,1 % das accións de Fandicosta), este luns formalizouse esa operación, que supón que Wofco asume as instalacións de Domaio (Moaña) e o 90 % do persoal que traballa en produción dun total de 214 traballadores.
Ademais, tras a quita aceptada polos acredores, Wofco asume o resto da débeda (ao redor dos 20 millóns de euros) e a Xunta aceptou ceder a súa participación a cambio do mantemento dos empregos.
Nun comunicado, a conselleira de Economía e Industria María Jesús Lorenzana puxo en valor o traballo das partes para chegar a un acordo e o papel da Oficina Económica do Igape.
Fandicosta xa asinara a principios deste ano un contrato de opción de compra a favor da pesqueira viguesa Wofco, e naquel momento a Xunta xa renunciou á recompra da súa participación na empresa a cambio dese compromiso de mantemento de polo menos 90 % do emprego.
As valoracións dos sindicatos
O sindicato CCOO valorou o acordo de venda e sinalou que, a partir de agora, insistirán en reunirse coa nova propiedade "para coñecer de primeira man os proxectos presentes e de futuro que o grupo Wofco ten para a nova compañía".
"Agradecemos o esforzo de todas as partes, administración, comprador, vendedor e, especialmente, das persoas traballadoras que conseguiron superar o preconcurso e que se execute a venda con éxito, cumprindo en todo momento cos pedidos dos clientes, mantendo o nivel de compromiso e calidade", sinalou a central.
Pola súa banda, UXT tamén puxo en valor "o traballo conxunto de todas as partes implicadas" como "fórmula de éxito" para sacar adiante unha situación "moi complicada", como a que había en Fandicosta.
"Fixemos o que se esperaba de nós para dar continuidade no emprego ás persoas traballadoras dunha importante empresa do sector mar-industria", subliñaron, e defenderon que "este é o camiño que cómpre seguir" para defender a industria galega, "cunha administración galega implicada e cunha clase empresarial, neste caso Wofco, disposta a apostar por seguir investindo e xerando valor na comarca".
Igualmente, a CIG celebrou que a venda é o peche dun proceso que "acaba ben" porque non se perde emprego e se mantén a actividade da empresa. Con todo, insiste o sindicato nacionalista, aínda que "parece un proxecto solvente", é importante que os representantes dos traballadores poidan reunirse pronto cos novos propietarios para "coñecer os seus plans de futuro".