Chamada para manter as reservas de sangue en nivel suficiente en verán

As reservas de sangue dos grupos A+, A- e 0+ están baixas e desde a Axencia de Doazóns de Galicia, ADOS, chaman a doar. É o que fai desde vai para trinta anos Dolores, segundo nos conta mentres agarda a súa quenda de entrada na unidade móbil instalada onda a casa do Concello de Ribeira.

Explica que cada vez que a chaman ela acode e se por algunha razón non pode doar, non o fai. Pero se pode, doa. E que o fai porque é necesario. "Eu pensaba que como o meu sangue, A positivo, teno tanta xente non faría falla. Pero, claro, precisamente por iso é da que máis saída ten. E agora pediron A positivo. Porque é necesario e agora pediron A positivo", di Dolores.

A súa actitude é especialmente valorada en verán, cando moitas persoas doadoras co cambio de rutina tamén deixan de lado este xesto de solidariedade e xenerosidade. Iso si, as necesidades de sangue nos hospitais galegos seguen a ser as mesmas no verán. De aí a invitación a sumar novas persoas doadoras. Por se o dubida, escoite as razóns desta veterana:

"Non doe nada, recupérase axiña. E que cando menos o pensas pode facerche falta a ti, porque se os bancos están baleiros e precisas unha operación podes quedar sen operar por falta de sangue. E se todos doamos e poñemos unha gota, o banco vaise enchendo. E son dez minutos para quitar o sangue, que non é nada".

Pode doar na unidade de hospital se está nunha das sete cidades ou nas unidades móbiles que se desprazan por Galicia.