Chegan a Compostela os "instagrammers" no Camiño
Chegan a Compostela os "instagrammers" no Camiño
Cinco días de peregrinación desde Ourense a Santiago contados desde as redes sociais
Máis de 3,6 millóns de seguidores puideron coñecer o Camiño a través dos seus "influencers"
A actriz Cristina Castaño, os cantantes Luis Cepeda e Roi Méndez, as influencers Natalia Maquieira e Tamara García Romero e o cómico Xurxo Carreño remataron hoxe a súa peregrinación a Santiago. Foron durante cinco días os Instagrammers do Camiño. A última etapa, de Vedra ata o Obradoiro cóntana desde as súas redes, onde suman máis de 3 millóns e medio de seguidores entre todos.
Cen quilómetros, desde Ourense a Santiago en cinco días pola Vía da Prata. Hoxe remata este camiño de convivencia, con filloas para almorzar e a bo ritmo para chegar ao Obradoiro antes do xantar. Así o foron contando durante unha semana estes seis influencers galegos, a través das súas stories.
É o Camiño destes anos 20, en dixital, vivido e capturado por estes referentes da música, do cine, ou da propia rede, que llelo amosaron, en tempo real, a millóns de seguidores que queren saber todo deles.
Para nostálxicos quedarán os diarios de viaxes en papel cheos de notas e debuxos. Hoxe son stories, reels e buscámolos por Hashtags, #GaliciaDestinoSeguro e #CamiñaGalicia, pero finalmente todos contan a experiencia do Camiño.
