Chegan as rebaixas de xaneiro, no medio de descontos frecuentes e promocións

Aínda non rematou a campaña de Nadal e xa están aquí as rebaixas de xaneiro.  Os descontos chegaron xa a algúns establecementos e, a partir do día 7, tras os Reis, comezarán nos grandes centros comerciais. Encadéanse deste xeito as campañas de ofertas constantes e promocións, que terminaron coa imaxe de multitude de persoas facendo cola para conseguir as maiores gangas.

As rebaixas tradicionais de inverno e verán teñen, desde hai doce anos, cando se publicou a normativa que permitiu a liberalización da actividade comercial, o reto de non perder forza perante o estado permanente de descontos.

Os dous períodos seguen sendo datas sinaladas para os consumidores, sobre todo para algunhas xeracións, segundo Cesar Díaz, avogado da Federación de Consumidores e Usuarios-CECU, pero outras campañas que están plenamente instaladas no seu calendario, como o Black Friday, fixeron que se reduza "a súa intensidade e protagonismo". As repetidas ofertas dos grandes mercados en rede, o acceso xeneralizado a Internet e o auxe das tendas de segunda man están a permitir comprar a baixos prezos ao longo de todo o ano sen ter que esperar ás rebaixas de inverno e verán.

Piden consumo responsable fronte ás avalanchas

Sen defender as restricións ás rebaixas que había antes de 2012, o portavoz de CECU advirte de que a actual situación está a xerar "un consumismo desaforado e innecesario e, á súa vez, moitos problemas ambientais". Por iso desde a confederación, aínda que admiten que as rebaixas poden ser unha "moi boa oportunidade para mercar cousas" que se necesitan, fan fincapé en que hai que exercer un consumo "responsable e crítico" fronte á cultura do "usar e tirar que xera grandes cantidades de residuos que se exportan a terceiros países".

"Comprar por comprar non só afecta o noso peto. É producir de forma innecesaria", segundo o experto, que aconsella aos que decidan sacar 'a pasear' estes días as tarxetas de crédito fixar un orzamento máximo, realizar unha lista co que necesitan adquirir e non recorrer a créditos rápidos para mercar aquilo que non é prioritario.

Baixa a previsión do gasto medio

Un estudo realizado pola Asociación Española de Consumidores (Asescon) prevé que os compradores gastarán unha media de 164 euros, 21 euros menos que o ano pasado.
Madrid (202 euros de media), Biscaia (201) e Valencia (200) son as tres provincias onde hai unha maior previsión de gasto por parte de cada un dos consumidores. As que menos son Albacete (120 euros), Ceuta (123 ) e Cáceres (124 ).

Segundo este informe, de antemán os españois non están moi esperanzados no que van atopar porque o 88 % mantén que as rebaixas "non van achegar ningún desconto adicional" dado que se publicitaron outros descontos en meses anteriores.

A pesar diso, o 80 % di que cre que vai gastar cartos, e iso a pesar de que case a metade descoñece todos os dereitos que lles asisten neste período de rebaixas.

Non baixan os dereitos

A Organización de Consumidores e Usuarios (OCU) lembra algúns dos dereitos dos consumidores:

-Os produtos teñen que estar na oferta do establecemento durante un mes polo menos e teñen que mostrar o seu prezo orixinal, xunto ao rebaixado, ou ben indicar de forma clara a porcentaxe da rebaixa.

-A garantía e o servizo posventa son iguais, independentemente de que se compre o produto en rebaixas ou non.

-En caso de que se establezan condicións especiais para este período (limitacións no medio de pago ou nas devolucións), os comercios están obrigados a indicalo de forma expresa.

-Se o produto está en perfecto estado, o comercio non está obrigado a cambialo (salvo se así o anuncia ou publicita), aínda que a maioría faino porque é unha boa práctica comercial. Non teñen por que devolver o diñeiro e poden cambialo tamén por outro artigo ou por un vale.

-O consumidor "en liña" está especialmente protexido: ten catorce días naturais para devolver a súa compra se non lle convence.

-Se se vai mercar un electrodoméstico ou algún produto electrónico, é aconsellable, para constatar que a rebaixa que se anuncia é tal, contar coa axuda dunha das webs ou aplicacións que foron xurdindo como Camelcamelcamel, Keepa, Idealo, Fluctúate ou Twenga, entre outras.

Cando comezan as rebaixas

Moitos comercios xa anuncian as rebaixas de xaneiro, como Cortefiel, en cuxa web se anuncian descontos significativos desde hai días na marca e noutras que publicita.

El Corte Inglés lanzou ata o 5 de xaneiro unha campaña de descontos de ata un 40 % nunha selección de produtos con motivo da entrada do ano novo, e xa será o día 7, se segue a pauta habitual, cando comece coas súas grandes rebaixas.

Así o fará tamén o grupo Inditex -Zara, Massimo Dutti, Lefties e Oysho-, que as adoita iniciar por Internet o día 6.