A proposta de baixas "flexibles" causa un choque frontal no Goberno de coalición

A ministra da Seguridade Social chama á calma, pero está decidida a abrir o debate da reforma das baixas laborais. Propón que, nalgúns casos, os traballadores enfermos poidan incorporarse de maneira voluntaria aos seus postos de traballo. 

A idea aínda está verde pero a ministra pensa, por exemplo, en persoas que estean con determinados tratamentos oncolóxicos ou con dous empregos. Pero o tema é moi complexo.

A primeira resistencia está no propio Goberno. Yolanda Díaz xa lle respondeu vía redes sociais que coa saúde non se xoga. Pero Saiz non se engurra e lémbralle que as competencias son dela. 

Discrepancias no seo do Goberno e negativa tallante de Podemos ou socios coma Bildu. Os argumentos, de momento, tampouco convencen os sindicatos. Para os empresarios si ten sentido. 

Non é un tema menor. Mestúrase saúde con economía. A ministra Saiz defende que trata de ampliar dereitos e nega que teña por obxectivo aforrarlle cartos á Seguridade Social. Pero o certo é que os números falan por si sós. 

O ano pasado houbo máis de 8 millóns de baixas laborais. E a factura superou os 25.000 millóns de euros. O gasto disparouse máis do 70 por cento no último lustro. Que se abra agora ese debate apunta a que tamén se intenta taponar esa ferida.